Zum Inhalt springen Überspringen auf die linke Seitenleiste Zur Fußzeile springen

23.02.2022

Scho widdä a Cloon, wu freundlich vom Ordn rundä grüßd. Vielleichd wo des dä Gedanggn, dass die zwa Charakdäköbbf in dä Reiafolch ve Kaschbä ven Ordn rou grüßn?!

Und weils su schö is, a Stüggla in Dialeggt. Ähnlichkeiddn mit lebenda oder gschdorma Leud wööhn rein zufällich!

Selbergmachda Sau

In mancha frändischn Döffä wedd zwaa Moll im Joh hausgschlochd. Ich koo mich o die Zeid nuch gud erinnä. Es wo Dradidion, dass mä die ganz Väwandschafd dezu eigeloudn hod. Mä hilfd aweng zamm beim Ausnähma ve dä Sau und dänouch gibbds a gräffdicha Woschdsubbn und späidä a gscheida Schlochdbladdn.

Dä Bauers Hann hodd seina sämdlichen Leud zammagedrummld und desmoll wo aa sei Kusina ve die Sdodd doua, mid ihrn Moo und ihrä glan Dochdä. Mä hodd hald die Schdoddä scho lang nümmä gsähn und die Glaa ven Ernsd dud mä ja nuch go niä su richdich kenna.

Die Weiber senn alla scho in dä Küchn und dunn alles aweng vobereidn. Die Kinner spilln hinder de Scheuna im Gaddn und die Monnsbilder machen sich o die Sau ze schaffn.

Fürn Ernsd is des wos Neus, dä wo nuch nie beim Schlochdn dabei. Die Sau is scho hie und edzed senn sie groud drüber, sa oo an Houggn no ze henga. Des is fei go niä su leichd, wall su a mordsdrümmä Ding gewesn: Ball vier Zendner! Ze verd hänga sie des Viech oo die Hindäfüss noo und dou baumld sie edzedla, erbarmungswürdich middn Kuopf nouch undn. Dä Hannla hodd es Fleischermessä in de Händ, zwinckerd mid an Aach in Erndsd zu, setzt oo und schliddzd däre Sau in Wansd auf.

Dann machd ä an Hupfä zerügg, oubä zu späid für Erndsd. Dä gans Darm ve därä Sau kümmd mid an Dembo rausgsausd. Dä Erndsd will flüchd, solberd, bollerd no und des ganza Zeuch über na drüber. Edzed is es Gelächdä gruoß und der Erndsd is dä Depp. Seina Kolläing zerna erschd amol raus und er löffd su versaud wierä is under die Dusch.

Die Kinner sen häbei kumma und in Erndsd sei Döchdäla, blebbd wie oogewodzeld sdenn. Späidä wie´s die Schlochdbladdn gäim hod, mouch sie kann Bissn eß. „Ich ess nichts von einem selbstgemachten Schwein, bei uns gibt es su etwas nicht. Wir haben Fleisch nur vom Metzger.“ sochd sie.

Dä Erndsd oubä maand lachend: „Iich louß mäs jeddzed richdich schmeck!“ Und dä Hannla maad, Rechd hosta, Erndsd, hau nä nei, schließlich häids däs ja ball niä äläbd. Um an Hoo häid Dich die Sau däschloungn! Prost!

Aus „Gschichdla und Gerichdla vo uns Frankn“ von Lydia Scheubert.