Freidouchnochd in Schwörbetz

Äldära ve uns erinnern sich nuch, wie des su wo, oo an Freidouchzomd, wenn mä zen Beispill a Güeggela vedrüggd hot, bei die Beddy, und nouchn öschdn Gaddnzau, denn mä aufn Filzla gebaud hod, gedochd hod: „Mensch, wos dusdn jedz scho hamm?!“

Dou is mä die Sdrouß vüe geloffn und beim Fuchmonn hod mä nuch Lechd gsähn. Meisdns wo mä ja niä allaa, also aussän eichna Affn, wohn nuch a boo andra Käll debei, die nadürlich niä bessä beiannane wohn und gans selbstväschdändlich hom die genau gleich gedochd! Auf die Höi ven Wäbä hod mä nouched um die Eggn gelinsd, weil beim Fuchmonn wohn ja blous a boo Alda ghoggd.

Dä Gigg hod nadürlich a nuch Lechd ghobd und die Mundwinggl sän nouch uom ganga. „Freunde dä Nochd, hob dä Harry oudä dä Hubby is nuch dou, also nei!“ Blanka Nosdalgie, wenn mä durch die öchd Düä durch wo und die zweid, a Schwingdüä, hod su an gans besondän „Sound“ ghobd. Mä koos mid nix vägleich. Gleichzeidich hod sich dä Geruch geänddäd. Groud hod mä nuch in Güäggelesschmogg in dä Nousn, die Mundwinkl und Hoo ghobd, wos sich gans blödslich in an Geruch ve Ziegareddnraach und a bissla Moddä gedräihd hod. Die dridde Düä wo nouchä die richdich. Durchs gelba Flaschnbuodnglous hod mä scho ve draun gsähn, ob nuch a poo Männla dou wohn und meisdns wohns niä amol weng. Rechds dä gruoß Sdommdiisch in Niernform, wo immä besedzd, fasd jäidä hod aweng sein Schdommblodds ghobd. Groudaus, dä long Tisch, dou woohn die älderen gsessn und hom ze allermeisd aa aweng oh iän Gaddnzau gebaud. Rechds die Dischla woohn meisdns schbärlich besedsd und meisdns hod dou droo aanä aweng gschloufn. Lings die Dhegn, wu mä kaum woogenumma wohn is, oubä me hod scho o die frischn Gläisä, die schnell undän Hoohna ghaldn woohn senn, im Aangwinggl gsähn, dass dä Wird oudä sei Stellvedräidung midgrichd hom, dass dou a poo kumma, die nuch an Durschd hom. „Servus, grüßd Euch, a aweng dou?!“ und scho hod mä an Blodds ghobd und wenn mä a ze sechsd woo, ka Broblem! Dä Sbillautomat hod geblinggd und meisdns wo immä dä a und dä selb devoo gsdanna und hod seine „Woungräidä“ versenggd. Beim verliern wo rä alla, oubä wehe ä hod a Serie ghobd. Dou wo ein Hollou und öfd amol hods dodsächlich a Loggolrundn gäim, weil die Kisdn amol wos ausgschbuggd hod. Schnell wo mä im Gschbräch oder mä hod die Kaddn ausgebaggd, weil a bissla Zwiggla is immä ganga. Auf die Uä hod dou kannä drauf geguggd und wenn mä amol gemüssd hod, konnd mä durchn Näimzimmä, om Billiard vebei, odä die Haubddüä naus. Rauchä wohn dou kanna vo die Düä gsdanna, weil die woon ja alla drina. Des konnd mä sich go niä vosdell, dass mä zen Rauchn naus gemüsd häid.  Also is mä in Gong nindä, dou wo a Schdehdischla gschdana, um dänn woon meisdns a poo gans junga rum gsdanna. Die hom sich nuch niä su rechd nei gedraud, weil sie ja groud amol su 16 Jährla wohn oder su. Ve den Sdehdiisch wo mä nämlich schnell hindn draun, wenn vonna aanä rei ghumma wöh, dä die Junga su um dreiväddlelfa rum, dou nümmä häid sää deffn. Des Gloo woh nadürlich aa nuch amol a gans andra Oord ve Geruch und mä hod gäichä aanä Wend gebrunzd, wu nouchäd undn alles zamgeloffn is. Sogo späidä, wie die Bissoas insdalierd wohn, hommä immä nuch nei däära Rinna gsaachd, weil sich des hald su gekööhd hod. Wenn mä dann zerügg kumma is, mussd mä öschd amol alles kondrollier, ob dou dä Biäsdond im Glous nuch däselb wo, oder ob niä die Kaddnschüssela verdauschd wohn senn? Meisdns hods scho gebassd und wenn amol wos vokumma is, woo schnell widdä Friedn. Offiziell wo aans die „Schberrschdund“ oubä des hod seldn an gekümmäd, niä amol in Wird, weil es Drinkgeld is ja midn Beggl gschdieng. Öfd amol woos „Halbä“, wenn mä nouchäd doch aufgebrochn is und ob des auf dä Roodhausuä jeds a zweiä odä a dreiä wohh, hod widdä kann inderessierd.

Und wie woo des gesdänn? Im Schüdznhäusla hod die Öschd gschossn und es hod Körriwöschd gäim. Und weils aweng gloud wo, hod mich a Schüdznbrudä mit nou nähma wölln. Äh hod oubä gsochd, dass ä sei Audo öschd hamfääd, weil bei die Feuäwäh, wo doch Johreshaubdversammlung und die senn doch beschdimmd nuch dou?! Also aweng gewadd, bis es Audo deham woo und nei. Dä Börchers, die Räd, alla nuch dou und scho woh mä middn im Woohlkombf. „Ey, souch amol Gemaarood, bisdn Du übähaubd in dä Wääh?“ „Naa, bis jetzt nonnich, oubä bassdn miä übähaubt su a Oozuch? No, des wäh mä gleich säähn und zack hod dä Rood die Jaggn oo und a Aufnoohmeondroch hod sich a nuch gfunna. Es gibd sie hald doch nuch, die zwaa Gaddnzeu, wu mä oo an Oomd bau koo. Schöna Grüss von S.A.M.